Zwä ganz alde Leitcher, sie hän e paar Gäns,
e Gääß un zum Planze e Pläckel,
hän aach noch e Wissje, wu rauscht als die Sens
un hole noch 's Gras ime Säckel.

Mirem wackliche Wächelche fahren ses hääm
un packen 's ball kaam noch zu ziehe.
Sie häns nimmi eilich un laafen bequem.
sie missen sich aarich drum miehe.

Sie hängen am Haisje. an all ehrem Sach
wu miehsam is aageschafft worre.
En mächticher Nussbaam im Hof halt die Wach,
's is aach schun en uralter Knorre.

Es is ebbes Heemliches do um des Haus,
wu die alde Leitcher drin wohne.
Mer spiert : Gottes Sege geht ei un geht aus
un will se for alles belohne.