E ganzes Lewe lang zu lewe
damit 's eem schbeeder aach ned reit
des is gewiss e Leischdung ewe,
do braucht mer Gribs im Kopp un Zeit.

Die Meischde rennen wie die Esel
doch bloß dem bissche Reichtum noo
bis dass se schbeeder schdill im Scheesel
wern uff de Friedhof nausgezoo.

E ganzes Lewe lang zu lewe
des will bedacht sei recht un gut,
un des is grad des Scheene ewe
wanns eem bewusst is, was mer dut.

Ned, dass mer bloß die Zeit vertreedelt
un sich beschickert als mit Wei.
Dass mer die Schdunne sich veredelt,
des is es Wichdigschde debei.

E ganzes Lewe lang zu lewe
damit sich 's lohnt aach Mensch zu sei
is wohl es allerschenschde Schdrewe
un bringt for Leib un Seel was ei.

Vernünftich lewe bis zum Schluss
mög jedermann beseele,
ehr wisst, wie ball mer gehe muss,
drum dut eich ned so queele.