Ich will en scheene Gruß eich bringe
vun unserm scheene Pälzer Land
un was ich saa soll herzlich klinge,
die Pälzer sin defor bekannt.

So'n Pälzer Daag is doch was Scheenes,
der weckt eem uff, des kann mer saa.
Des is doch e Geschenk, e kleenes,
do macht's aach Spass was vorzutraa.

Drum will ich pälzisch mit eich redde
un froche wollt ich, wie's eich geht?
Ehr liewe Leit, ich möcht druff wette,
heit sin mer all gut uffgeleet.

Uns Pälzer kann doch nix verdrieße,
des hän mer doch schun oft bewiss',
do duhn so leicht kee Träne fließe,
meer nemmen 's Lewe so wie's is.

Des macht die Palz, die stimmt uns heiter,
bringt Frääd ins Herz un Sunneschei.
Mit frohe Aache sieht mer weiter,
do stellt sich mee Begeischdrung ei.

Drum ruf ich froh, willkumm for alle,
uff pälzisch do verzehlt sich's gut,
un 's soll eem jo aach do gefalle,
dass mer mol werre kumme duht.

Ich will kee langi Redd drum schwinge,
dann 's soll jo nor e Koschtprob sei,
vun unserm Land, vor alle Dinge,
vun unsre Häämet un vum Wei.

Meer sin e frohes Volk voll Lewe,
e jedi Landschaft prägt ehr Leit.
Des basst zum Wald un zu de Rewe,
weil uns die Häämet viel bedeit.