Liewer Gott, ich mach kee Sprich,
wann ich saa, mer brauchen Dich.
Ich will ganz uff Dich vertraue,
dann uff Dich, do kann mer baue,
Du bischd groß, des gäb ich zu,
un nor du kannschd Wunner duh,
kannschd uns helfe in de Not
un de Sorg ums däglich Brot.

Liewer Gott, bischd unser Licht,
unser ganzi Zuversicht.
Sin mer manchmol aach im Dalles,
unser Glaawe, der traat alles,
dass es werre uffwärts geht,
wann 's aach noch so brenzlich steht.
Aafang, Lewe, Glick un Enn,
alles leiht in Deine Hänn.

Liewer Gott, ich will ned klaa,
was ich traa kann, will ich traa.
Schaffe will ich un will lache,
helf uns, dass mer 's richtich mache,
dass die Kraft zum Lewe reicht,
was mer gern duht, fallt eem leicht,
des gebt Mut, in Gottes Name,
so wie 's kummt, so traan mer 's, Ame!