Die Feschte sin halt 's A un 0.
Mer is net bloß zum Schaffe do.
's is besser luschdich sei un singe
als Ärger in die Welt zu bringe.

Egal ob 's um die Kerwe geht,
ore ob sich 's um de Worschtmarkt dreht,
ore ob mer mol e Fahn weiht ei,
die Feschte woll'n gefeiert sei.

In jedem Dorf, uff jedre Stroß
werrn Feschte g'feiert, klee un groß.
Des g'hört sich so, verlossen eich druff,
mit Rettich fangt 's a. mit Keschte hört's uff.

Fascht jeder Winzer macht sei Fescht,
de Wei schmeckt, wu re wachst es bescht.
Do steckt noch Kraft un Schwung dehinner,
die Pälzer sin die Fescht-Erfinner.

Es Feschte feire steckt halt aa,
die Pälzer hän ehrn Spass dodraa:
am Stroßefescht, am Fischerfescht,
jetzt fehlt bloß noch e Krischerfescht,

Beim Kreische geht en Wind, en frischer,
die Pälzer sin die gröschte Krischer
wu 's gewwe duht, meer kreischen halt,
un wer lang kreische kann, werd alt.

Jetzt noch en Vorschlag, im Vertraue,
ich meen, mer sollt mee Stroße baue,
mee große Stroße, des wär 's beschte,
do gäb 's dann noch mee Stroßefeschte!