nix wie ärger

Nix wie Ärger un Verdruss
hot mer uff de Welt,
weil mer däglich esse muss
un des koschd doch Geld.

Un es Geld is weg im Nu
kaafschde Flääsch un Worschd,
ned nor des, mer braucht aach Schuh
un mer hot aach Dorschd.

Macht eich mol e Bild devun
wammer vun de Luft
lewe kennt un vun de Sunn,
un vum Blumeduft.

Wär des ned e scheeni Sach
un mer hätt deheem
mit de Fraa de halwe Krach,
ach wär des bequeem.

Männer vun de Wissenschaft
setzt eich uff die Hosse:
Nor mol 's Esse abgeschafft,
es Trinke kennt 'r losse.