Ich frää mich als so kolossal
wann's singt un klingt in Berg un Daal
un hör ich als en Männerchor
kummt mer die Welt viel schenner vor.

Do kann mer saa, die Sach is gut,
is worzelfescht un sitzt im Blut
un hot en Wert un is uns not
wie frischi Luft un 's däglich Brot.

Vum erschte bis zum letschte Gang,
in diefschter Not, im Iwwerschwang,
is nöticher wie Gut un Geld
die Liedkultur for unser Welt.

E gutes Lied is wie Arznei,
die wu eem häält un macht eem frei.
Es is e Stärkung for die Kehl,
sowie for's Herz un for die Seel.

Drum bleiw'n die Sänger froh un jung
un halten 's ganze Land in Schwung,
sin immer gut gelaunt un froh,
un wann was is, dann sin se do.

Un kummt emol e triewi Stunn,
wu's Glick vertribb werd un die Sunn,
un stehn der Träne im Gesicht,
die Sänger bringen Troscht un Licht.

Die Sänger bringen Sunneschei
un bringen Schwung un Stimmung rei,
drum winsch ich uns for alle Zeit,
dass immer de Gesang gedeiht.