Ich bin so gern am Rhei in Ludwigshafe.
in dere Stadt, do fiehlt sich jeder wohl.
Die goldich Frääd is uns net abzukaafe,
do is de "Anker" 's rechte Stadtsymbol.

Do spiert mer Frohsinn, Herzlichkeit un Lewe,
's werd viel gesunge un aach gern gelacht.
Wann in de Stadt am Rhei die Möwe schwewe,
do geht eem 's Herz uff, wann mer des betracht.

Vun weitem hört mer schun die Schiffssirene
un Wimbel sieht mer vun so manchem Land.
Als wär'n mer Weltstadt ball, so kennt mer meene,
dorch die Chemie halt sin mer weltbekannt.

Des is de Ankerplatz vum Pälzer Strewe.
als jungi, scheeni Stadt, mit Herz un Sinn.
Mer spiert so richtich do die Luscht am Lewe.
Bin froh, daß ich in Ludwigshafe bin.