ich hab halt nix zu klaa

Ich hab im Lewe nix zu klaa:
en brave Bu, e gudi Fraa,
e Schwiegermudder wu ned schellt,
un ab un zu als Sunndagsgeld;
gesund un luschdich bin ich aa:
Ich hab halt nix zu klaa.

Ich hab im Lewe nix zu klaa:
an Fasnacht sin mei schenschde Daa;
Vergnieche is mei Schdeckpferd,
dann so lebts leicht sich uf de Erd,
un närrisch bin ich aa:
Ich hab halt nix zu klaa.

Ich hab im Lewe nix zu klaa:
Die Kerb is do, hurra!
Wie fiehl ich mich als Kerweborsch
bei Kerwewei so frei un forsch,
do kann mer werklich saa:
Ich hab halt nix zu klaa.

Ich hab im Lewe nix zu klaa:
Kann leicht mei Bündel traa.
Besonders wann als Schlachtfeschd is
do gäbts for mich viel Frääd gewiss;
beim Wellflääsch denk ich aa:
Ich hab halt nix zu klaa.

Un wann ich was zu klage hätt
un det 's eich saa, ehr Leit, ich wett,
ehr gebten mer keen Schnatz defor
un deswä bin ich selbschd so kloor
un schweig mich aus un saa:
Ich hab halt nix zu klaa!