Is net des Wörtche Häämet schun allee
e liewes Wort, ich finn des wunnerschee.
Un froot mer mich.was hot des for en Sinn,
saa ich, do spichelt sich mei Lewe drin.

Mei ganzes Lewe, so wie's is un war,
war for mich stets wunnerbar.
Deheem zu sei, bedeit mir unendlich viel,
gleich wu ich bin, die Häämet is mei Ziel.

Mer is doch uff dem Fleckche do gebor',
des derf mer net vergesse, des is wohr.
Un was des hääßt, des kann mer gar net saa,
des muss mer dief in seiner Seel drin traa.

Dann uhne Häämet wär ich uhne Frääd.
Ich saa's als oft zum Troscht wie e Gebet:
Behalt dein Glaawe un dei Muddersprooch
un halt die Wohrred un dei Häämet hoch.

Un wer's so macht un wer des recht bedenkt,
dem hot de Herrgott werklich viel geschenkt,
der kann sich glicklich preise alle Daa
un kann mit Zuversicht sei Schicksal traa.