for die mannsleit

Oft hört mer die Bemerkung,
dass ball de Kraache platzt,
die Männer brauchen Schdärkung
sunschd sin se schwer verratzt.
Wie 's is, so kanns ned bleiwe,
die Weibsleit sin zu schdark,
des schikanöse Treiwe
geht eem dorch Bee un Mark.

Schun an de erschde Pleite
trotz dere große Huld
domols zu Adams Zeite
war aach e Weibsbild schuld.
Die Eva griet de Rappel
un esst, was bischd, was hoschd,
eefach vum schensde Appel
trotz gurer Pälzer Koschd.

Des war vor lange Johre,
doch Evas gäbts noch heit,
wern däglich nei gebore
aach noch in unsrer Zeit.
Ich glaab ich kann mers schenke
noch mee zu saa do druff,
brauchschd bloß ans Geld zu denke,
dann geht der´s Licht schun uff.

Die Weibsleit missen schbiere,
de Mann is Herr im Haus,
er hot se kummandiere
un teilt Befehle aus.
Ich muss geschdeh als Kenner
des is ned mee wie Recht,
dann schließlich sin die Männer
es stärkere Geschlecht.