Feierowend, Feierowend . . .
Wie vertraut klingt des un lowend
un hot gar en diefe Sinn.
Was ich do so glicklich bin
hör ich 's Owendglöckel leite . . .
Ja, des sin mei schenschde Zeite:
Feierowend, Feierowend.

Feierowend, Feierowend . . .
So die Welt im Schdille lowend
kummt die Ruh in Haus un Herz.
Alles guckt jetzt himmelwärts
wie die Sunn so schee geht unner,
is des ned e wahres Wunner?
Feierowend, Feierowend.

Feierowend, Feierowend . . .
Saa meim Nochber schnell genowend,
raach mei Peifel, les mei Zeitung,
vieles schdeht do vun Bedeitung,
un dann geh ich froh ins Bett
wie wann ich kee Sorge hett:
Feierowend, Feierowend.