Es Lewe is zu korz ehr Leit
for Krach zu mache un for Schdreit,
for sich zu balche un zu schlaa
un böse Worte sich zu saa.

Uns nützt de Friede bloß un Ruh
un halt e bissel Glück dezu,
„damit sich 's Bündel leichter traat“,
so wie mer als geweenlich saat.

Mer braucht keen reiche Mann zu sei,
dann Reichtum bringt nix Gudes ei
un is verderblidl aach fors Herz
un for die Seel un macht oft Schmerz.

E Vochelschdimmch - wann ichs heer –
e gudes Wort, des riehrt mich mehr,
un gäbt mer die Gewissheit dann,
dass ich mich aach noch fräe kann.

An Kleenichkeite un de Kunschd
wu die Nadur uns biet umsunschd.
Wie schnell wern die paar Johr vergeh,
un wer dann geht, losst alles schdeh.

Er nemmt nix mit, - wuhie aach bloß?
Dann so e Grabloch is ned groß.
Ich frooch als oft in mich enei:
Wann siehn des bloß die Mensche ei?