En Daag is for mich e gewunneni Sach,
ich frää mich als morgens schun, wann ich werr wach.
Egal, ob die Sunn ore Rää mich beglickt,
ich nemm ´s grad eso wie 's de Herrgott uns schickt.
Ob so, ore so, es hot alles sein Sinn,
in jedem Daag leihn aach Goldkerncher drin,
mer muss se nor suche un muss sich drum mieh,
un derf net die Welt gar zu griesgräämisch sieh.

En Daag is for mich wie e koschtbar's Geschenk,
ich kann mich schun frääe druff, wann ich dra denk,
kann lache un singe un peife dezu,
kann wannre, kann schaffe, ore sunscht ebbes duh,
kann mole un schreiwe, grad wie mer 's gefallt,
wer des hot begriffe, find immer en Halt.
Mer muss nore wolle un dankbar drum sei,
dann bringt jeder Daag uns was Nitzliches ei.