die schubkarchständ

Noch mee wie hunnert Feschte gäbt's vum Wei,
doch ´s schenschte Fescht un 's gröschte owwedrei,
des is de Worschtmarkt mit de Schubkarchständ,
do wu mer noch die echte Pälzer Schobbe kennt;
wu noch die Pälzer Dichter treten uff.
Die Schubkarchständ, die sin geeicht do druff.

Do saan aach oft die Leit als, sakrament,
was wär de Worschtmarkt uhne Schubkarchständ.
Do wu mer noch de echte Winzer sieht
un wu mer noch e warmi Flääschworscht grieht,
wu ´s heit noch zugeht wie vor hunnert Johr,
mit Weck un Worscht un Wei un mit Humor.

Die Schubkarchständ sin 's Worschtmarktsrenomee.
Was Tradition hot, derf net unnergeh,
denn an de Schubkarchständ en Schobbe stemme
is besser als wie Tee un Drobbe nemme.
Die Schubkarchschobbe sin en wahre Staat,
des hab ich, ehr Leit, immer schun gesaat.

Des macht in Derkem halt de gute Wei.
Ganz Derkem kann do froh und stolz druff sei.
Viel dausend Schobbe gehn do dorch die Händ.
De Glanz vum Worschtmarkt sin die Schubkarchständ.
Ich nemm mei Glas un ruf eich zu recht froh,
beim nägschde Worschtmarkt bin ich werre do.