die palzkaard

Ich schlaa als oft die Palzkaard uff
un such die scheene Fleckcher druff
die wu im ganze Land verschdräät . . .
weil mer do Schpass dra griet un Frääd,
dass mer en Pälzer is un wohnt
Halt so zu saa ned hinnerm Mond.

Do leit de Trifels hoch un hehr,
de Pälzer Wald un 's Felsemeer,
im Daal de Rhei, o Herrlichkeit,
un dort die Burge alder Zeit . . .

Aach Speyer mit em Dom der Kaiser
un seine viele scheene Heiser,
es Eckbachdaal, de Drachefels,
die lsenach un 's Forschdhaus Schmelz,
die Kalmit un de Bismarcksturm,
de Dunnersberg voll Sunn un Schdurm,
die Weischdrooß mit de Rewehäng
bei scheene Gäärde, Wää und Gäng,
un all die Dörfer groß un klee
lein uff der Landkaard wunnerschee.

Doch wäß ich gut als Pälzer Kenner
in Werklichkeit is alles schenner.
Die Fröhlichkeit un 's Drum un Dra'
des zeigt halt so e Kaard ned aa.
Die Witz, die Lieder un de Wei,
de Frohsinn for ins Herz enei,
des muß mer alles selbschd erlewe
im Palzer Land voll Sunn un Rewe.