die frääd

Die Frääd is gut for Groß un Klee,
sie macht uns jo die Welt erscht schee.
Drum hääßt's jo aach, mer soll sich frää,
des stimmt, do hot mer nix degää.
Mer soll sich frääe un soll singe
un soll net gleich zum Dokder springe,
dann besser als wie Drobbe nemme
is alsemol en Schobbe stemme.
En Schobbe, un do merkscht im Nu,
wu pälzer sin geht 's luschdich zu.
Un g'sund sei un en frohe Mut
is mee wert als wie Geld un Gut.
Dovun is keener ausgenumme,
die Frääd, die muss vum Herze kumme
wie Vochelsang un Sunneschei,
sie muss die Quell vum Lewe sei!
Ob Proteschtant, ob Katholik,
des is for uns kee Missgeschick.
Vor Gott, des wääß ich ganz gewiss,
is eener was de anner is.
Es Lewe bringt uns all Gewinn
un Friede wann mer eenich sin.
Mer saat jo aach, was ich begrieß,
die Palz war mol es Paradies.
Un was mol war, bei unserm Wei,
muss doch aach heit noch möglich sei;
bei dere Frääd un dem Humor,
mer muss bloß selbscht was duh defor.
Des kann mer jo aach gut versteh,
mit Frääd duht alles leichter geh.
Ich hab's schun immer prophezeit,
die Pälzer sin badente Leit,
wu luschdich sin, so wie's soll sei
un trinken gern e Gläsche Wei,
un Pälzer Wei un Pälzer Worscht
verdreiwen Hunger, löschen Dorscht.
Die goldich Frääd bringt uns die Sunn,
do kann mer froh sei jedi Stunn.
Un was en echter Pälzer is,
bleibt Optimischt, des is gewiss,
wu helft so gut wie 's geht un lacht
un wu aus allem 's Beschte macht.
Egal ob 's stirmt, ob 's schneit, ob 's räänt,
die Pälzer Leit sin Spass gewehnt.
Un was kann helfe in de Not?
E Schlickche Wei, e Stickche Brot,
e scheenes Lied, e gutes Wort,
do is die Palz de rechte Ort.
Des langt uns doch, was wollen mer mee?
En guter Mensch sei, des is schee.
Drum halt ich an meim Grundsatz fescht,
sich frääe is un bleibt es bescht.
Do lacht eem 's Herz, des halt eem fit,
ich kann nor rote, frään eich mit;
an Rhei un Lauter, Glan un Blies,
dann bleibt die Palz es Paradies
vun frohe Mensche un vum Wei
un dofor wollen mer dankbar sei.