de weistroß entlang

Fahr nie in deim Lewe die Weistroß entlang
mit Griesgram im Herze un uhne Gesang.
Des deet unsern Herrgott im Himmel verdrieße.
De Wei vun de Weistroß den muss mer genieße,

Der will eem in himmlischi Stimmung versetze,
bloß derf mer net haschte debei un net hetze.
E Eikehr am Haardtrand, zum Frohsei beim Wei,
soll immer en scheener Besinnungsdaag sei.

Do lacht eem de Himmel, do kann mer sich sunne,
als wär mer direkt mit em Herrgott verbunne.
Im Weistock leiht Lewe, un 's Glick is so noh,
die Pälzer Gewächse die machen eem froh,
die muss mer prowiere am Ort un studiere,
die duhn eem so richtich vun Herze kuriere.