aus alt mach nei

Heit hört mer oft, aus Alt mach Nei.
Des is aach richtich meinerdrei,
dann heit mit denne neie Sache,
do kannscht fascht alles neier mache.
´s gäbt Mittel, die sin wunnerbar,
noch schenner wird 's dann als wie 's war.

Bloß bei de Mensche merkt mer halt,
wammer mol alt is, bleibt mer alt
un ´s Schicksal nemmt eem am Schlawittel,
do helfen aach kee neie Mittel.
Die Uhr laaft aus, die Zeit werd knapp,
do beißt die Maus keen Faade ab.
Do kannschte greine ore lache,
des is halt so, do kannscht nix mache,
do helfen aach kee Sprich, kee schlaue,
do helft nor Mut un Gottvertraue.

´s is unser Schicksal, ich sieh 's ei,
des is halt so, des muss so sei.
Un schließlich hab ich nix degää,
mer kann sich aach im Alter frää,
un trinkt, wann's geht, sei Gläsche Wei,
ich glaab, des kann keen Fehler sei.

Drum dröscht ich mich, des gäbt mer Mur
aach alte Besem kehren gut.
Die sin oft besser wie die neie,
dann wu die kehren, bleibt nix leie.

Ich bin zufridde, kenn keen Groll,
do spiel'n die Johre doch kee Roll,
un was ich bin, un was ich hab,
´s hängt högschtens vun de G'sundheit ab.

Un uhne Alter, uhne Tugend,
do gäb's kee Kinner un kee Jugend.
Es Jungsei fräät eem, liewer Buu,
awwer 's Älterwerre g'hört dezu,
des is normal, ich wääß genaa,
aach ´s Alter bringt noch scheene Daa.
Bringt Glick un Sege ganz gewiss,
weil 's Alter jo die Krönung is.

Un kääm ich uff die Hunnert druff,
deet ich net saa, jetzt hör ich uff,
un schmeiß de Grembel eefach hie.
's kummt net in Frooch, des mach ich nie.
Solang mer noch de Schobbe schmeckt
un Gottes Kraft noch in mer steckt,
solang 's noch ebbes gäbt zum Lache,
will ich noch mei Gedichte mache.

So war ich, bin ich, bleib ich halt.
Ich geh erscht, wann de Vorhang fallt.
Wie 's Schicksal will, 's werd net gebrummt,
en echter Pälzer nemmt's wie 's kummt.